قصيدة من الشعر الملحون تصف الصحراء و أهل ( البدو)
كلمات الشاعر لمباركي بلحاج مسعد – الجلفة
جولة في صحرائنا
يا سمعني كانك تهوى الخطرا * اتونسني ورادفك نقداواثنين
انديرو جوله مليحه فصحرا * فوڨ أجواد امخيرو ومصيل زين
صيلو عربي كان فالي للظهرا * وسط المرجه مادخلش الكوري شين
ومحجل ملربعه سارع قدرا * من نوع انكسبوه منا خيالين
سرجو ضاوي ناقشينو بمهرا * بالنجمه وهلال بانو وقادين
أفراش السرج امخيرو موله خبرا * تحتو طرحه طابعاتو علجنبين
وركابو مصنوع فضه مشهورا * ولجامو معدول فشده ويلين
وصراعات موزقه دارا دارا * موزقها فنان في عملو بيدين
وحزاموا تحت اسدر عامل دورا * والخمسه وسط اجبين تنح العين
والدير اعلى رﭬبتو داير مارا * وسبيبو عليمنه طايح بلعين
والتصميرا جديد ركابو سيرا * واجد عودي والف الخطرا ومهين
انفزوا قبل الصلاة مع البكرا * ونوريه ولايتي وأهل التﭬمين
انزوروا فيها قواشي مذكورا * ونشفوهم فلمدن والنقالين
ما يحـﭬرش انزيهم قوم النعرا * وهاذي عاده فلعرب مند سنين
اوصلنا قبل العشا درنا زقرا * بتنا نحكوا والسوامر شعالين
بجناب وملفوف وجماعه دايرا * واحنا نحكوا والحطب منو سرﭬين
واعشنا ملفوف فوڨ المجمورا * وشي الحطب ايزيد فلبنه نصين
ومعاه المطلوع مخبوز البرا * وﭬمح الصحرا شاكرينو وكالين
لمصور معروف وجبه مشهورا * وطيابو فوڨ الحطب ومداوي زين
ومن بعدو مسفوف فتلاتو حرا * ومسـﭬـي بدهان وعسل حر بنين
وبالقهوه والشاي تكمال السهرا * وبالشعر رجالوا يباتوا ﭬصارين
بتنا نحكوا في اخياما مستورا * وبحديث الميعاد يبرى كل حزين
يا حصراه عللخيام اللي حمرا * ويا حصراه على البدو الرحالين
يا مزين مرحولهم وقت الخطرا * بيه ايطوفو علوطن يسرا ويمين
والصرعوفه صوتها عندو نـﭬرا * وصوت الـﭬصبه زادها تحفه وحنين
أمات اللقو صياحها صوتوا سرا * عللخرفإن اللي عليها مرسيين
أنياﭬا حنت علمخاليل العطرا * وخيلا تصهل في رتبهم مربوطين
اصيادت لرنب والحجل ثم حبرا * ولصيد الغزلان لازم وحايين
صيدو صاعب ليه صاﭬه منتشرا * حيحايه برودها كاسح ومكين
ولباس الميعاد وبرى للشهرا * تحتو لبيض فيه مسعد منسوجين
والـﭬندوره نايلي ورقه حرا * وعمامه بيضاء أماتر محسوبين
والعربي كوستيم كامل للسترا * ونوي خيطو علعمامه لفراسين
وألبست اتقاشير لكراعو سترا * وعكازه فليمنه ﭬالش سكين
ومظلو معدول نواه اللورا * ولمكردي صباط شركو بان متين
وﭬرابوا مليان ومعاه جبيرا * كل أسبوع ايجو رجالو سواﭬين
والبلقه صباط ما فيه سيورا * يلبسها من دار بست اعللكرعين
واذا جا سواڨ منهم للدشرا * مصاريف الضيف عنها متفقين
وماكلهم علحطب ﭬاع مسرا * مهيش اعللـﭬاز قرعه وبادين
وﭬصاع الطعام للقاشي عشرا * كل آخر عظموا ﭬبالو معروفين
كل أخر سهموا ﭬبالو لا هدرا * والحوته وسط لـﭬصاع الممليين
وﭬدحيات من اللبن ماهي قبرا * ميش اللحظه المنتنه وسط كراطين
ولي ﭬـفص أمن اجبن فقرا فقرا * مهوش الفرماج مخدوم بعامين
والشخشوخه و ادهان مع الكسرا * ورب العكه يفطرو بيه القصبين
بوكعوا له بنتو فيه احرار * بوصلوع ارفيس عند زوج اسمين
دﭬـلة نور يﭬدموها والتمرا * وﭬد حيات من اللبن ول من اشنين
ماهم صافي في عيون وفـﭬرا * ولحم الأدمى والفشتال وبوﭬرنين
ذي عادات جدودنا راجل ومرا * ويمتازوا بلباسهم حتى انساوين
نبدالك بالملحفه والـﭬندورا * والحولي والشد والخمري ساترين
والبثرور مدربياتو وظفيرا * ودارت خاتم والخمس منـﭬاش ثمين
والصرع على جيدها طالع شعرا * ريحة مسك معاه عنبر فواحين
والشركه وسخاب فالرﭬبه برا * ريحه فاحت ماعرفتش روحي وين
واحدايد فلييد والمدور درا * مشية لدمي فصحر شارد ومهين
هذه عادات لينا حاضرا * وتبعنا ها للوصيه طباقين
مانذيش اللي يجاورنا عرا * واللي جانا بالقدر عندو قدرين
يعرفنا من جال ما فينا غدرا * وما تلـﭬـى فينا ابخيل ولا نقصين
كلمة عيبي باقيه فينا سيرا * علمنا ها للذاراري وصايين
والبدوي في خزرتو تلـﭬـى عبرا * صابر شاكر خالقو راضي ومين
ما يمكر مثل العباد المكرا * وعدو صادق علكلام ايدير الدين
مايعرف نفاق لا مناورا * ديمه جدي في كلامو صح أمكين
والبدوي لولاتو يعطي إشارا * تعليمات ايطبقوها محترمين
والبدويه فلعرب زينة عشرا * مشهوره بخلاقها علحضريين
مادخلتش المدرسه ما هي تقرا * تعرف للميعاد والخلق الحسين
جملت بعض من الحيا شهمه حرا * والطاعه للزوج ومعاه البوين
هذه نبذه علعرب قاش النصرا * وتوضيحات تفيد من هم سوالين
واللي شك إيجي هنا يعمل دورا * ويلـﭬـى اللي ﭬلناه ثابت ببراهين
عودي طاح من التعب وشخر شخرا * يتألم بيه التعب واهن مسكين
هذا بر بعيد موسعها صحرا * طفنا بيه تراب سته وتلاثين
منطح راسوا للسما دابك خزرا * ينهج يلهث والعرڨ كاسيه ينين
قبلتوا للراس وحفرت الحفرا * ودعتو ودموع عيني جرايين
ولو ما جاش حرام وتولي كفرا * نفدي عودي نختم عليه الستين
وندفن جسمو في تراب المقبرا * ونبني ﭬبرو بالجواهر ومراجين
ونصنعلو تمثال يتخلد ذكرا * يبان يوقد والشواهد لماعين
يساهل ذا العود تبقالو مارا * مثلو عودي عود عنتر شباهين
ولى عود اللي امسمي حيدارا * صابر صبروا كي الخيل المشكوريــــن
ﭬلت أندونها هنا تبقى ذكرا * يتفكروها ناس بينا مهتمين
للي مشاف بلادنا عنها يقرا * يتمتع بشعارنا يعرفنا وين
كلمات الشاعر لمباركي بلحاج مسعد – الجلفة
